نه‌ینه‌وا/ ئه‌سوات ئه‌لعیراق: سه‌رچاوه‌یه‌كی‌ سوپای‌ عێراق رایگه‌یاند هێزه‌كانی‌ سوپا، سه‌رله‌به‌یانیی‌ سێشه‌ممه‌، ته‌رمی‌ گه‌نجێكیان له‌ نزیك گوندێكی‌ رۆژئاوای‌ قه‌زای‌ مه‌خمور دۆزییه‌وه‌.
سه‌رچاوه‌كه‌ به‌ ئاژانسی (ئه‌سوات ئه‌لعیراق)ی راگه‌یاند “سه‌رله‌به‌یانی ئه‌مڕۆ هێزه‌كانی سوپای عێراق له‌ نزیك گوندی دیوزانتی(32كم رۆژئاوای مه‌خموور)، ته‌رمی كوڕه‌ گه‌نجێكی نه‌ناسراویان دۆزییه‌وه‌”، رونیشیكرده‌وه‌ كه‌ “شوێنه‌واری دوو فیشه‌ك به‌ سكی قوربانییه‌كه‌وه‌ دیاره‌”.
سه‌رچاوه‌كه‌ ئاماژه‌ی‌ به‌وه‌شدا كه‌ “ته‌مه‌نی‌ كوژراوه‌كه‌ له‌نێوان 20 بۆ 25 ساڵاندایه‌‌و به‌هۆی نه‌بوونی ناسنامه‌وه‌ نه‌ناسراوه‌ته‌وه‌”.
وتیشی‌ “بۆ لێكۆڵینه‌وه‌ له‌ رووداوه‌كه‌، ته‌رمه‌كه‌ گوازرایه‌وه‌ بۆ نه‌خۆشخانه‌ی ناوچه‌كه‌، هاوكات تا ئێستا هیچ كه‌سێك به‌ هۆی په‌یوه‌ندی به‌ رووداوه‌كه‌وه‌ ده‌ستگیر نه‌كراوه‌‌و پۆلیس لیكۆڵینه‌وه‌ی‌ خۆی‌ له‌وباره‌یه‌وه‌ ده‌ستپێكردووه‌”.
قه‌زای‌ مه‌خموور له‌ رووی‌ ئیدارییه‌وه‌ سه‌ر به‌ پارێزگای‌ نه‌ینه‌وایه‌‌و ده‌كه‌وێته‌ دووریی‌ (63كم) له‌ باشوری‌ رۆژئاوای‌ هه‌ولێره‌وه‌.